La Bodega
La historia d'una viticultura heroica, nacida en Limés, Cangas del Narcea, y que güei siguen los que creen nel so llegáu.
Cangas
La Denominación d'Orixe Protexida Cangas asítiase nel suroccidente d'Asturies, una tierra de fonda tradición vitivinícola.
La nuesa bodega ta en Limés, nel mesmu corazón d'esta denominación, onde les viñes tán condicionaes por un clima de monte, suelos ricos en pizarra y esquistos y una orografía de pendientes fuertes.
Un paisaxe esixente que da llugar a un cultivu de calter bien artesanal, onde'l trabayu nes terraces fai de cada vendimia un exerciciu de viticultura heroica.
Historia
Nestes tierres, mientres xeneraciones, la viña formó parte de la vida de les families de Cangas, que cultivaben pequeñes parceles heredaes de padres a fíos. Sicasí, la despoblación rural y la gueta de nueves oportunidaes lloñe del campu punxeron en riesgu esta forma de vida. Foi entós cuando persones como Antón Chicote decidieron siguir apostando per esta tierra, calteniendo les sos viñes centenaries y una forma de trabayar xunida al territoriu, y evitando que'l monte acabara ocupando'l llugar de la viña.
Presente
Dende la nueva perspeutiva de la Bodega Antón Chicote, damos continuidá a esi compromisu cola nuesa propia forma d'entender la viticultura. La nuesa bodega caltién parceles con cepes centenaries, d'una calidá escepcional, que se trabayen siguiendo la tradición, buscando la máxima sostenibilidá y col respetu a los ritmos de la tierra como base.
La mesma orografía torga la mecanización y márcanos el camín: equí la vendimia y tolos cuidaos faense a mano, con dedicación, cepa a cepa. Trabayamos les viñes respetando la singularidá d'un territoriu que pide muncho pero que, a cambéu, nos devuelve vinos d'una calidá y una personalidá úniques. Suelos de pizarra y esquistos que dexen que'l territoriu s'esprese, dando llugar a vinos atlánticos de marcáu calter mineral.
